الضرب ومشاكله .. اعرفي أكتر من المقال
تعرفي إيه هي المشكلة اللي الضرب ممكن يعملها في شخصية طفلك؟
الضرب هيغير شخصية طفلك
وهيحوله إما لطفل عنيد أو طفل مستسلم
ودا بيرجع لنوع الشخصية الأصلية اللي اتولد بيها طفلك
إذا كانت قوية ولا ضعيفة
فالو طفلك عنده چينات بتقول إنه شخصية قوية
فالضرب هيحوله لطفل عنيد
أما لو طفلكِ عنده چينات بتقول إنه شخصية ضعيفة
فالضرب هيحوله لطفل مستسلم
ودا ليه؟
لإن الطفل لما بيضرب على تصرف عمله أو كلام قاله
في الأول بيتألم جسدياً
يعني الضرب بيوجعه
لكن بعد شويه الألم الجسدي دا بيتحول لألم نفسي
بيزعل من مامته اللي ضربته وبيزعل على نفسه وأوقات بيحس بالظلم
ومع تكرار الضرب الألم النفسي دا هو اللي بيعمل تغير في شخصية الطفل
فالطفل اللي شخصيته قوية
هيزيد عنده درجة التحدي وهيتمسك برأيه أكتر حتى لو متأكد إن رأيه غلط
وهيرفض كل الطلبات والتوجيهات
ومش بس كدا دا هيعمل عكسها
ومن هنا بيظهر العند الغير الصحي في شخصية الطفل وكل ما الضرب يزيد هيزيد معاه العند
أما الطفل اللي عنده ضعف شويه في شخصيته
فهيستسلم للأم عشان يحمي نفسه من الألم ومن الإهانة
وهنلاقيه ماعندوش مانع يتنازل عن رأيه وعن احتياجاته
مقابل إن مامته تهدى عليه وتبطل تأذيه
ومن هنا بيتحول لطفل مستسلم
المشكلة إنه مش بيستسلم للأم
دا عنده استعداد يستسلم لأي حد شخصيته أقوى منه ويجاريه في أي تصرف المهم إنه يحمي نفسه منه ومن ردود أفعاله
وطبعاً انتي أكيد فاهمة خطورة الاستسلام على طفلك للي حواليه على سلوكه
الضرب عمره ما كان طريقة من طرق التربية ولا وسيلة من وسائل تعديل السلوك
الضرب عنف مش تربية.
سهام البسيوني
أخصائي إرشاد نفسي وأسري
تربيتي