للأمهات .. طرق مبتكرة تشجع الطفل وتحمسه يخلص واجباته بهدوء.
واحدة من الأمهات قالتلي إن عندها حاجه غريبة بتحصل مع ابنها لما بيرجع من المدرسة وبعد ما يغير هدومه ويتغدا ويقعد شوية بيكون متحمس يكتب الواجبات بس بعد شويه حماسه بيختفي.
طبعاً طلبت منها تحكي لي اللي بيحصل بالتفصيل
فقالتلي إنها بتطلب من ابنها إنه يجهز كل الكتب اللي مطلوب فيها واجب
وبعد ما بيعمل كدا ويرص كل الكتب بتلاحظ إن حماسه قل جداً.
هنا اكتشفت الغلطة اللي بتعملها الأم
واللي بتخلي الطفل يهرب من المذاكرة والواجبات
الغلطة هي إن الطفل لما بيجهز الكتب المطلوب فيها الواجبات
بيحس إنها كتيره وإن الوقت مش هيكفي ودا معناه إنه مش هيلحق يلعب شويه قبل النوم
فبيحبط وهو دا اللي بيخليه يكسل بعد ماكان متحمس.
بدأت أقوللها تتصرف إزاي عشان تشجعه إنه يبدأ واجباته
قلتلها أول حاجه علمي طفلكِ يحدد مهمة واحدة بس ويركز عليها وبعد ما يخلصها يشوف اللي بعدها وعشان ماينساش واجب من الواجبات خليه يمشي على حسب ترتيب الحصص اللي خدها في المدرسة. يعني يبدأ بواجب الحصة الأولى وبعدين واجب الحصة الثانية وهكذا.
قالتلي طب ساعات بيكون عنده 3 صفحات مطلوب منه يكتبهم ومش بيرضى.
قولتلها في الحالة دي علميه إنه يركز على صفحة واحدة وكإن الواجب هو صفحة واحدة بس
ويكتبها ولما يخلص ياخد فاصل قصير حركي بعيد عن أي أجهزة إليكترونية زي إنه يدخل الحمام يشرب حاجه ياكل حاجه وبعدين يرجع يكمل
ويعمل كدا مع كل واجب طويل.
قالتلي وفي حالة لما يكون عنده حل مسائل رياضيات كتيرة أعمل إيه عشان أحمسه؟
قولتلها خليه يبدأ من نص الأسئلة وممكن تخليه يبدأ من آخر سؤال
وبعدين قوليلي شوف السؤال اللي قبله واللي قبله واللي قبله هتلاقيه يخلص من غير ما يزهق.
قالتلها كمان دا في طريقة لذيذة جداً بتنفع بس مع الرياضيات واللغات كلها وماتنفعش مع المواد اللي فيها حفظ وهي إنك تسمحي لطفلك إنه يسمع أغنية وهو بيذاكر المواد دي أو بيحل واجباتها.
قالتلي طيب عامة في طرق جديدة تانيه
قولتلها أكيد الأفكار مابتخلصش
في طريقة مضمونه جداً
وهي إنك تخلي طفلك يحس إن في حاجه حلوة هتحصل لما هيخلص الواجب بدري زي إنك توعديه إن أدامه نص ساعة يعمل فيها اللي هو عايزه وسيبيه يختار بنفسه اللي يعمله
سواء اختار يلعب شويه ع الموبيل أو يتفرج ع الكرتون اللي بيحبه
الفكرة التانية إنك تعملي سباق بينك وبينه
مثلاً لو عندك مهمة محتاجة تخلصيها أو عندك كتاب عايزه تقرأ فيه
قوليلي تعالى نشوف مين فينا هيخلص الأول
الطريقة دي هتحسسه إن مش هو بس اللي عنده مسؤوليات.
وآخر حاجه عايزا أقولهالك
ماينفعش أبداً وقت مايكون طفلك بيذاكر إنك تسيبيه يذاكر وتقعدي انتي أدام التليفزيون أو تمسكي الموبيل
لإنه كدا هيحس وكأنه مقهور
هتلاقيه بيقول لنفسه ماما قاعده مبسوطة وأنا اللي قاعد بخلص واجبات
عشان كدا حاولي تكوني في نفس المكان اللي بيذاكر فيه أو قريبه منه وانشغلي بحاجات مفيدة.
سهام البسيوني
أخصائي إرشاد نفسي وأسري
تربيتي