للأمهات .. تجنبي العقاب لهذه الأسباب
ليه دايماً بنقول للأم حاولي تتجنبي العقاب على أد ماتقدري؟
لو عرفنا فكرة العقاب قايمة على إيه
هنفهم الحكاية
الفكرة الأساسية اللي بتخلي الأم تستخدم العقاب هي اعتقادها إن الطفل فاهم اللي بيعمله وبيغلط بمزاجه وأحياناً بتفتكر إن الطفل قاصد يضايقها
الفكرة دي بتخلي الأم عايزا تعمل أي حاجه المهم إن الطفل يحس بغلطته
فمبتلاقيش أحسن من العقاب
اللي بيأكد عند الطفل إحساس إنه مذنب
وللأسف الإحساس بالذنب دا بيبقاله تأثير سلبي على الطفل
لإنه بيرسخ عنده فكرة إن اللي بيغلط دا إنسان مش مقبول من اللي حواليه
وإنه عشان يرجع مقبول تاني لازم يمر بمرحلة العقاب
ودي طبعاً فكرة قاسية شوية على نفسية الطفل
وخاصة لما بيتحول العقاب لإسلوب حياة
فنلاقي تفكير الطفل وتركيزه كله وقت الغلط يروح على نوع وشكل العقاب اللي هيتعاقب بيه
وبالتالي مبيقدرش يركز يفهم غلطه ولا هيعرف إزاي ممكن يصحح الغلط دا
والمشكلة التانيه
إن كتر العقاب بيخلق ياإما طفل كداب
ينكر دايماً أخطائه عشان ما يوصلش لمرحلة العقاب
أو طفل بيسعى دايماً للكمال اللي مستحيل يتحقق
فنلاقي الطفل قرر إنه مايعملش أي حاجة عشان خايف يغلط
ومن هنا بيتحول الطفل لكائن سلبي
طيب! إيه المطلوب؟
المطلوب إن الأم تغير فكرة الطفل عن الأخطاء
فتعلمه إن الغلط شئ وارد وإن طبيعي جداً ومقبول إن الإنسان يغلط
بس اللي مش مقبول إنه يفضل يكرر نفس الغلطة على طول
معنى كدا إن الدور الصح للأم في الوقت اللي بيغلط فيه الطفل إنها أولاً تفهمه إيه الغلط اللي عمله
وثانياً تدربه إزاي يتعلم من غلطه عشان مايكرروش
ودا مستحيل يحصل طول ما الطفل بيتعاقب على كل غلطة بيعملها
عشان كدا حاولي تشوفي أخطاء طفلكِ إنها فرصة.
فرصة لتعليمه حاجات جديدة
فرصة لتعليمه يفكر في حلول بدل ما يقعد يفكر في نوع العقاب اللي هيحصله
فرصه لتعليمه إن الأخطاء مش نهاية
وممكن تكون بداية لشخصية جديدة
شخصية أكتر نضج
سهام البسبوني
أخصائي إرشاد نفسي وأسري
تربيتي