تربيتي
كتبت:سهام البسيوني
تعرفي إنك ساعات بتكوني سبب لزيادة العند عند طفلك
هقولك إزاي
كام مرة وصفتي طفلك اللي بيرفض يستجيب ليكي بإنه عنيد
وكام مرة اشتكيتي للي حواليكي من طفلكِ وقولتي عليه إنه عنيد أدامهم
وكام مرة طفلكِ سمعك وانتي بتشتكيلهم
طيب انتي عارفة بقى الكلام دا بيعمل إيه في دماغ طفلكِ؟
طفلكِ كل ما يسمع وصفك ليه بإنه عنيد وخاصة لما يكون أدام الناس
بيحس أن شخصيته أقوى من شخصيتك ودا بيخليه فخور جداً بنفسه عشان قادر يمشي كلامه عليكي
وللأسف بقى إنك دايماً بتأكدله الاحساس دا بإصرارك على وصفه بإنه عنيد في كل موقف بيرفض يستجيب ليكي فيه
التكرار دا بيخلي طفلكِ يقع في حب صفة العند
وبالتالي بيتصرف بالطريقة اللي تساعده يثبت صفة العند على نفسه
فتبصي تلاقي طفلك عمال يزود من درجة عنده ويرفض كل التوجيهات والطلبات اللي بتطلبيها منه
لدرجة إن كل اللي حواليه يوصفوه دايماً بإنه عنيد
الطفل في الحالة دي مابيضايقش خالص
بالعكس بيبقى مبسوط لإنه وصل للي هو عايزه
هو عايز الكل يشهد ويقر إنه عنيد عشان يفضل حاسس بقوة شخصيته أدام الكل
وفجأة تلاقي نفسك انتي وطفلكِ عمالين تلفوا في دايره مالهاش نهاية
هو يرفض فانتي توصفيه بإنه عنيد فيزود في عنده
طيب! انتي في الحالة دي المفروض تتصرفي إزاي؟
دورك هنا يتلخص في كسر الدايرة اللي بتلفي فيها انتي وطفلك
ودا هيحصل من خلال الخطوات دي
1- امنعي تماماً كلمة عنيد جوا البيت وكمان ماتسمحش لحد يوصف طفلكِ بيها مهما كانت درجة عنده.
2- اتناقشي مع طفلكِ عشان تديله حقه في طرح وجهة نظره.
3- اتعاملي مع رفض طفلكِ وإصراره على تنفيذ رغباته على أساس إنه احتياج مش عند.
4- اسمحي لطفلك إنه يحقق شوية من رغباته وشويه من لأاته عشان يحس إنه فعلاً مسيطر على حياته فيهدى ويقلل من عنده.
صديقتي الأم الحبيبة القريبة
العند مش كله وحش، العند أحياناً معناه إن الطفل عنده شخصية وله رأي، فبلاش تكوني انتي سبب من أسباب كسر شخصية طفلكِ.