للأمهات .. تعرفي على مخاطر إهمال بكاء الطفل الرضيع
الطفل من عمر زيرو لسنتين ماينفعش تهملي عياطه أبداً لإن عياطة بيكون نتيجة احتياج، معنى كدا إن الطفل غالباً بيعيط عشان عايز حاجه فمثلاً ممكن يكون جعان عايز ياكل أو عايز يغير الحفافضة أو حران عايز يتحمم أو في حاجه بتوجعه أو عايز حضن عشان يحس بالأمان أو عايز ماما تشيله عشان يحس انه متشاف.
الطفل مش بيعيط عشان يرخم عليكي
الطفل من عمر زيرو لسنتين
مايعرفش يعني إيه رغبات
هو عنده احتياجات بس
الاحتياجات دي أشياء أساسية غيابها عن الطفل بيتسبب في وجود مشكلة سواء المشكلة دي نفسية أو عضوية
يعني مثلاً الطفل اللي بيعيط عشان عايز يغير الحفاضة
لو الأم اهملته دا هيتسبب في حدوث إلتهابات
والطفل اللي بيعيط عشان عايز يحس انه متشاف
لو الأم اهملت عياطه
هيحس إن العالم مش مكان آمن له.
الطفل من زيرو لسنتين عمره ما بيعيط عشان عنده رغبة
هو دايماً بيعيط عشان عنده احتياج
فما ينفعش لما يعيط تسبيه يعيط
بحجة انه بيدلع أو انه هيتعود ع الشيل
فلما طفلكِ يعيط اشغلي بالك بانك تعرفي إيه الاحتياج اللي ناقصه
جربي تشوفي الحفاضة
جربي تشوفي تحت رقبته لو لقيتيه عرقان
يبقى طفلكِ حران
ومحتاج هوا أو محتاج جسمه يترطب بالمايه
جربي تلمسي هدومه من جوا
يمكن يكون في حاجه بتشوكه
احضنيه طبطبي عليه حسسيه انه مقبول ومتشاف وان عياطه موضع اهتمامك.
خليكي دايماً فاكرة إن الاحتياجات لو لم تُلبى هتتسبب في حدوث مشكلة لطفلك سواء كانت مشكلة نفسية أو عضوية.
كتبت:سهام البسيوني
أخصائي إرشاد نفسي وأسري
تربيتي