أهم إحساس تديه لطفلكِ عشان تضمني إنه يطلع إنسان سليم نفسياً هو إحساس الأمان
طيب الطفل إزاي يحس بالأمان؟
دا هيحصل بتلت خطوات
الخطوة الأولى
هي وجودك انتي وباباه في حياته بشكل حقيقي
ودا من خلال التواصل بجميع أشكاله
من أول التواصل الجسدي بالحضن والطبطبة
والتواصل الفكري بالحوار اليومي مع الطفل بعيد عن الأوامر والنواهي
لحد التواصل الروحي بالتعاطف والدعم والمدح والتشجيع
الخطوة التانية
هي وجود الطفل في بيت هادي
بين أب وأم بينهم حوار وبيعرفوا يتكلموا ويضحكوا مع بعض
متفاهمين بيعرفوا يتناقشوا من غير ما النقاش يقلب بخناقة
الخطوة التالتة
ودي خطوة مش كتير بياخدوا بالهم منها بالرغم من أهميتها لاستقرا الطفل نفسيا
وهي إن الطفل مايكونش عنده قلق من رد فعلك ولا من رد فعل باباه
يعني لما بيغلط أو بيعمل أي تصرف مش مقبول
مابيكونش خايف من اللي هيحصل فيه منك أو من باباه
مهما كانت غلطته
لإنه دايماً بيلاقي أم وأب بيستوعبوا جهله إنه لسه بيتعلم وبيتقبلوا أخطائه وبيساعدوه يتعلم منها
إحساس طفلك بالأمان مش بس بيربي لك طفل سليم نفسياً دا الأهم إنه بيساعدك في تربيته بشكل عام
سهام البسيوني
أخصائي إرشاد نفسي وأسري
تربيتي
