إزاي ندرب الطفل على الصيام من سن 4 ل 5 سنوات؟
الطريقة اسمها صيام المشاركة بتعتمد إن الطفل هيصوم فترة من النهار ويفطر وقت المغرب عشان يشارك الأسرة وقت الفطار
كلامنا النهارده عن الطفل من 4 ل 5 سنين
هنقسمه له رمضان لنصين 15 و 15
في النص الأول طفلكِ هيصوم نص ساعة بس قبل المغرب
يعني طفلكِ هيفطر الصبح أول مايصحى ويتغدى كمان
وهيفضل ياكل ويشرب طول النهار عادي
وقبل المغرب بنص ساعة فهميه إنه هيمنع الأكل والشرب لغاية ما المغرب يأذن
وقبل ما يبدأ الصيام خليه يشرب مايه ينوي الصيام
في النص التاني بقى من الشهر هنخليه يصوم ساعة قبل آذان المغرب
برود هيفطر ويتغدى ويفضل ياكل ويشرب طول النهار عادي
وقبل المغرب بساعة هتقوليله يشرب مايه عشان يبدأ الصيام وعلميه ينوي الصيام
وطبعاً في الحالتين طفلكِ هيفطر مع الأسرة كلها مع آذان المغرب عشان يعيش معاكوا ويشاركوا الأجواء
طيب إيه الهدف من المرحلة دي
إيه الهدف من المرحلة دي؟
الهدف إن الطفل يشارك الأسرة في أجمل لحظة بيعشها الصايم
وهي لحظة الفطار أول ما المؤذن يقول الله أكبر
وكمان هيتعلم إن الفطار بيكون على صوت أذان
كمان المرحلة دي بسميها مرحلة فهم الطقوس
يعني الطفل من خلالها هيتعرف على الصيام ويفهم طقوسة بطريقة عملية بعيد عن الشرح والكلام الكتير
يعني هيفهم إيه؟
هيفهم إن الصيام هو الامتناع عن الأكل والشرب لغاية ما نسمع آذان المغرب
وهنأكدله على حقيقة إن الامتناع دا طاعة لله سبحانه وتعالى
وإن الصيام عبادة مش عقاب
ودا هيوصل لطفلكِ اللي سنه من 4 أو 5 سنين كويس جداً
لإن الفترة اللي هيصومها هتكون قصيرة جداً
نص ساعة أو ساعة فطفلكِ مش هيحس بالإجهاد ولا بالتعب وبالتالي هتبعد عنه فكرة إن الصيام نوع من أنواع الحرمان أو العقاب
وبالعكس طفلكِ هيحب جداً اللحظة اللي هيسمع فيها المؤذن وهو بيقول الله أكبر وخاصةً إن الأسرة كلها بتتشارك مع بعضها وبتعمل كلها نفس الحاجه في نفس اللحظة
كلهم بياكلوا وبيشربوا في نفس اللحظة
ودا كله هيخليه يفرح ويكون عايز يعيد التجربة معاكوا تاني يوم
سهام البسيوني
أخصائي إرشاد نفسي وأسري
تربيتي